Azərbaycan Respublikası Xüsusi Dövlət Mühafizə Xidmətinin əməkdaşları Heydər Əliyev Fondunda olublar

Azərbaycan Respublikası Xüsusi Dövlət Mühafizə Xidmətinin (XDMX) əməkdaşları aprelin 18-də Heydər Əliyev Fondunda olublar.

Ümummilli lider Heydər Əliyevin anadan olmasının 90 illiyi ilə bağlı ziyarətə gələn Xüsusi Dövlət Mühafizə Xidmətinin əməkdaşlarına Fondun fəaliyyəti haqqında ətraflı məlumat verilib.

Fondun ümummilli liderin zəngin irsini öyrənərək təbliğ etdiyi qonaqların nəzərinə çatdırılıb. Bildirilib ki, o, müxtəlif sosial-iqtisadi, mədəni layihələr həyata keçirməklə Azərbaycanın tərəqqisinə, mədəniyyətinin və tarixinin təbliğinə köməklik göstərir.

XDMX-nin əməkdaşları Heydər Əliyevin şəxsi arxivindən götürülmüş və onun fəaliyyətinin ayrı-ayrı dövrlərini əhatə edən, ulu öndərin həyatının ən müxtəlif məqamlarını əks etdirən, tariximizin bütöv bir dövrü barədə geniş təsəvvür yaradan şəkillərə və eksponatlara baxıblar. Onlar görkəmli siyasi xadimin uşaqlıq və gənclik illərinə, Moskvada keçmiş SSRİ-nin rəhbərlərindən biri kimi genişmiqyaslı fəaliyyətinə aid materiallara, Bakı-Tbilisi-Ceyhan əsas neft ixrac boru kəmərinin keçdiyi ərazilərin maketinə də tamaşa ediblər.

Sonra Fondun qonaqları Heydər Əliyevin şərəfli ömür yolundan bəhs edən “Böyük ömrün anları” sənədli filminə baxıblar.