Rusiya Federasiyasının Həştərxan şəhərində ümummilli lider Heydər Əliyevin adını daşıyan 11 nömrəli orta məktəbin nəzdindəki “Dostluq” uşaq bağçası Heydər Əliyev Fondunun təşəbbüsü ilə inşa edilib.
Bağçanın təməli 2013-cü il dekabrın 20-də Heydər Əliyev Fondunun vitse-prezidenti Leyla Əliyevanın iştirakı ilə qoyulub. 2014-cü il sentyabrın 29-da Həştərxanda səfərdə olan Azərbaycan Respublikasının Prezidenti İlham Əliyev bağçanın açılışında iştirak edib.
140 yerlik bağçada həm Həştərxanda yaşayan azərbaycanlı, həm də yerli ailələrin uşaqları təlim-tərbiyə alacaqlar. Ümumilikdə burada 2-6 yaş arasında uşaqlar üçün 6 qrup nəzərdə tutulub. Bağça bütün zəruri avadanlıq və inventarla təchiz edilib. Uşaqlar üçün müasir tələblərə uyğun idman və musiqi zalları yaradılıb.